Chavez prezantoi telefon celular për 14 dollarë

Presidenti i Venezuelës Hugo Chavez, prezantoi telefonin e parë celular të quajtur "El Vergatario", që do të shitet për vetëm 14 dollarë.

Chavez e prezantoi telefonin në spektaklin e vet të mbrëmshëm "Alo presidente", prej ku edhe e bëri bisedën e parë në telefon, duke iu lajmëruar nënës së vet, me qëllim që ta shënojë Ditën venezuelase të nënës.

"Ky do të jetë telefoni më i shitur celular në botë", deklaroi Chavez, duke shtuar se "menjëherë do t`i paraqitet Fidel Kastros, ndërsa biseda e tyre me këtë rast nuk do të mund të përgjohet nga autoritetet amerikane".

Telefoni edhe përkundër çmimit të ulët, mund të ketë qasje në internet, ka opsione për MP3, SMS, alarm zgjimi dhe opsione të ngjashme.

Aparati telefonik është prodhuar sipërmarrja kineze dhe venezuelase, e cila është në pronësi të qeverisë së këtij vendi.